قاطو البابيو


المقادير
250غ مرقرين كاس سكر قلاصي و تخدميهم مليح و تضيفي 2 بيضات
و شوية فاني و تزيدي تخلطيهم مليح و مبعد تنشفي بالفرينة و ديري 2
ولا 4 مغارف نشا و وحدة خميرة و تخلطي مليح و تخليهم لعجينة ترتاح شويا

لعجينة هيا عجينة الصابلي كل واحد و كيفاش يديرها كاين الي يديرها بصفار بيض
برك و كاين الي يدير نشا و الي مايديرش يعني تقدري تعتمدي على عجينة الصابلي
لي مجربتها انتي و موالفة ديريها و تجيك بنينة

و مبعد تجيبي السنيات الخاصة بالبابيون و ديري فيهم لعجينة و تخدميها بصبعك
مليح في المول باش يعطيك شكل البابيون

ديري لعجينة و دخليهم يطيبو ماتخليهمش يحمارو بزاف

و كي يطيبو احشيهم باي حشو تحبي ....انا ندير شيكولاة نذوبها في بان ماري و نزيدلها مغرفة و لا زوج حليب و مغرفة مارقرين و كي يذوبو نديرلها نوازات محمرة و مرحية خشينة و نخلطها معا الشيكولاة و نعمر بيها و نحط وحدة فوق و حدة و موالفة ندير تاني حلوى الكابريس نذوبها في بان ماري حتان ذوب و نديرلها شوي مرقرين و حليب قيس مغرفة و لا زوج برك و نعمر بيها و تقدري تاني ديري نيستلي طايب في لاكوكوط و كي يطيب ديريلو مغرفة نيسكافي تمد قو مليح و يجي كي الكاراميل بنين

هادو من بعد ماتعمريهم و ديري وحدة فوق وحدة و تخليهم ينشفو باش تلصق مليح و في النص ديري شوي كونفيتير و لا ناباج و ديري كوكاو و لا لوز مرحي شوي خشين في النص
و من بعد ديري شيكولاة تذوب في بان ماري و ديريلها شوي حليب و مرقرين مغرفة ولا زوج برك باش تجيك كحلة و تبري مليح و تقدري ديري قطرة زيت و لا ايلا عندك ناباج ديري في الشيكولاة باش تبقا تبري و من بعد ديريها في ساشي تاع سكر قلاصي فرغانة و لا ساشي تاع حليب و اثقبي ثقبة صغيرة و اطراسي لخطوط بالشيكولاة