اليوم جبتلكم اكلة تقليدية
وهيا
img][ندعوك للتسجيل في المنتدى أو التعريف بنفسك لمعاينة هذا الرابط][/img]
شخشوخة رقاق او شواط
ههههه
نعم هكذا اسمها
وكل واحد كيفاش يسميها
وهيا اكلة تقليدية بريكية 100/100
اليكم الصورة
وتتكون من 2حوايج
الفتات والمرق


[[img][ندعوك للتسجيل في المنتدى أو التعريف بنفسك لمعاينة هذا الرابط][/img]
الفتات يكون دقيق ملح وماء
كل واحد وطريقتو في طبخو
كين لي يديرو 2لوزات كيما يقولو
وكين لي يديرو خشين ويهرسو في المهراس
كل واحد كيفاش
والاحسن نتاع 2لوزات كيما لي درتولكم
المرق
يكون مبصل وحار ومدبش ام واش نقلكم وعليه شوي فلفل مرقد
بصحت لي ياكل
نمدلكم مقادير المرق
المرق التقليدي يكون من دون لحم
بصح كاين لي يدير لحم.ومن الاحسن دجاج عربي
هذي ترجع للامكانيات
المقادير( من دون لحم)
كيلو بصل .3حبات طماطم .مغرف طماطم مصبرة
كيلو كابوية(يقطين).مغرف مرمز
3سنات ثوم.شحم .زيت
طريقة التحضير
هذي الطريقة التقليدية .في ايناء نطبخ اليقطين.المرمز .قليل من الملح مع الشحمة وقليل من الزيت حتى تطيب .ومن بعد نزيد الطماطم .مغرف طماطم مصبرة .نتركوها تغلي شوي ومن بعد نزيدو البصل
منخليوهاش تطول ونطفي عليها
نلوح الفلفل المقطع .الدبشة .نصف مغرف دواء رقيق
ونسقيوها في قصعة نتاع عود وتخلط مليح مع مغرف زيت زيتون
ام
شهية طيبة
اما المرق لي يكون فيها لحم
تكون تختلف شوي
مقادير مرق لحم
لحم بصل ثوم دواء رقيق فلفل احمر 3حبات طماطم
2مغارف طماطم مصبرة ملح
وتغليها مليح
حتى يطيب لحم
وفي الطريقة التقليدية قبل متنحي لحم ترمي فلفل لخضر
شوي وتنحي لحم
يكون لحم نتاعك مداوي مليح وفيه ريحة نتاع الفلفل
ام ام روعة
نكمل .بعد منحيو لحم نمرق بما دافي

ونرميو المرمز
ونخليوها تغلي حتى يطيب
وفي الوقت لي نطفيو على الطبخة نلوحو فلفل اخضر
انا اليوم درتها بلحم
بصحتكم
قبل التقديم نديرو الدبشة .ونديرو زيت زيتون او زبدة او دهان حار
وشهية طيبة

ولي عندو اي حاجة يزيدها نكون ممنونة

اسفة بزاف على الكلم لي راح نقولو .بصح غاضتني روحي .بصرحة

بصح لزم

انا هذو الموضيع منيش ندير فيهم باش نكون مشهورة في المنتدى كيما وصلني

بلعكس

لوكن كانت حابة الشهرة اسهل حاجة
كوبي كولي

وهذي راكم اكل عارفينها

بصح وين بريكة هنا
واش محل اعراب بريكة عندك.عراش .متخلفين
شعبية
نعم

ايه انا شعبية.عروشية وبنت دوار ونفهم واش هو الدوار واو العرش
وعرشي كبير لله يبارك
.بصح منيش متخلفة ومنيش نبين في حويج بريكة لي مش ملاح


بنت راجل متواضع ومراة متواضعة ناس على قدهم

بصح الحمد لله على كل شئ

ونزيد نقلكم حاجة

مزال نزيد نحط موضيع بزاااااف انا شاء لله
لله غالب منعرف ندير اليوتوب .لوكان نعرف ندير اكثر من هك


على الطبخ الربيكي التقليدي القديم.مفرمسة .بومفور .عصيدة ........والقائمة طويلة
ونزيدك من الشعر بيت

راح ندير قسم على النسيج
الزربية البريكية
كلمي موجه لصاحب الرسالة
انا نفرح كي نصيب عندي رسالة
بصح تصدمت من المحتوى


بريكة متواجدة في دمي

وتقليدية ونص
ونعاود نقول
مش من طبعي نرد على لي يسبني
ليس خوف.لاني متربية
كانت قادرة نرد عليك في قسم اخر
بصح لزم نرد عليك هنا

ونتمنى توصلك رسالتي
انا منردش في الخاص
نرد هنا
باش منتصدمش مرة اخرى من حتى عضو(ة)

اسفة

مشكور اخي بريكي

بصح راني رديت

وهذا يكفيني

مشكور

انا افتخر بهذا الاكلات مشكورة اختي شمس
ولمعلومكم ان بعض النساء لا تجيد طبخ هذه الانواع من الماكولات
راني نستعرف بيك يا اختي شمس باين عنك مراءة حرة و تجيدين الطبخ
راني من الصورة سخفت

السلام عليكم
حاب نضيف حاجة اي واحد ينتقد الشخشوخة اعلن عليه الحرب
و الي ينكر اصلوا الا ........ حشاكم
بريكي غيور متنساش الزيت زيتونة

houssam كتب:

انا افتخر بهذا الاكلات مشكورة اختي شمس
ولمعلومكم ان بعض النساء لا تجيد طبخ هذه الانواع من الماكولات
راني نستعرف بيك يا اختي شمس باين عنك مراءة حرة و تجيدين الطبخ
راني من الصورة سخفت

مشكور اخ حسام

galaxy_dreams كتب:

السلام عليكم
حاب نضيف حاجة اي واحد ينتقد الشخشوخة اعلن عليه الحرب
و الي ينكر اصلوا الا ........ حشاكم
بريكي غيور متنساش الزيت زيتونة

مشكور اخي

مرانش في حرب والا في ساحة نتاع شتم

اما شخشوخة بزيت الزيتون

اه معندي منقلك

هههه
نورت اخي

ومشكور هلى المساندة

صباح الخير شمس المستقبل اقول لك يعطيك الصحه الف مره على اطباق بريكه ننتظر المزيد منها اما من يتكلم عن العرش تاع بريكه فاقول له عروش ونفتخر لان العرش *ولد رجال حررو الجزائر ونساء لهن حرف من ذهب *
واصلي يا شمس المستقبل ومتنسايش الباطوط

ههههههههه

حاضر الباطوط .الحرشية

متخافيش

راني ندير كلش ان شاء لله

مشكورة ختي ربي يعيشك

صباح الخير اختي شمس
ايه لقد اهتم الكل بشخشوخة انا اليوم راني طبختها كيما تاعك
شكرا لك واصلي باتحافنا بالماكولات البريكية التي تشهي
اخبرك ان اهل امي من سطيف يطلبون من امي تعليم زوجاتهم طبخها لانها لا تالم في المعدة احسن من تاع لمسمن
تحياتي

مشكورة ختي مريم

البارح كنت حابة نهدر معاك بصح الزهر

الكونيكسور 0000000000

ممممممممممممممممم والله تشهي الله يبارك
والله ياريت كل وحدة كي تحط طبخة خصوصا التقليدية تحط الوصفة معاها كيما انتي سيدتي الفاضلة
مشكووووووووووورة

نورتي

اذا تحبي كاش وصفة تقليدية قولي اذا نعرف نديرها علجالك

~ وصــفة مميــزة اخـ(تـ)ـي يعطيــك ألــف عافــية ~

على الطبــق الشهــي احسنت الاختيــار والتقـديـم ~

//

~ واصــلـ(يـ) معــنا ولا تحرمـ(يـ)ــنا من جديــدك ~

~ تقبلـ(ـي) مروري ~

مشكور اخي على التشجيع

شكرا لك
بصراحة اول مرة نسمع بيها شخشوخة بالمرمز
 

نعم بالمرمز وتجي يم يم يم 
معصحن فلفل مرقد 
وبردكيما هذا وزيت الزيتوووون
هههههههه